Իսրայելի պաշտպանության նախարար Իսրայել Կացը խոստացել է «ամրապնդել» Իսրայելի ինքնիշխանությունը Երուսաղեմի, այդ թվում՝ Տաճարի լեռան նկատմամբ, որտեղ գտնվում է Ալ-Աքսա մզկիթը։ 

X սոցիալական ցանցում հրապարակած իր գրառման մեջ Կացը լուսանկարներ է հրապարակել, որոնցում նա այցելել է Լացի պատ և լուսանկարվել ՑԱԽԱԼ-ի զինվորների հետ՝ հայտարարելով, որ աղոթել է պատանդների վերադարձի, իսրայելական համայնքների խաղաղության, անվտանգության ուժերի պաշտպանության և պաղեստինյան ՀԱՄԱՍ խմբավորման պարտության համար։

«Թիշա բի-Ավի օրը՝ Երկրորդ տաճարի կործանումից երկու հազար տարի անց, Լացի պատը և Տաճարի լեռը կրկին գտնվում են Իսրայել պետության ինքնիշխանության ներքո։ Իսրայելն ատողներն ամբողջ աշխարհում շարունակում են որոշումներ կայացնել մեր դեմ և բողոքել, և մենք ընդմիշտ կամրապնդենք մեր իշխանությունն ու ինքնիշխանությունը Երուսաղեմի, Լացի պատի և Տաճարի լեռան նկատմամբ», – գրել է Կացը։

Այս հայտարարությունն արվել է այն բանից հետո, երբ Իսրայելի ազգային անվտանգության նախարար Իտամար Բեն-Գվիրն այցելել է լարվածության օջախ հանդիսացող Տաճարի լեռ և բացահայտ աղոթել Ալ-Աքսա մզկիթի տարածքում՝ խախտելով փխրուն ստատուս քվոն։ 

Հորդանանն ու Սաուդյան Արաբիան դատապարտել են այս քայլը, իսկ Իսրայելի վարչապետի գրասենյակը հայտարարել է, որ ստատուս քվոն մնում է անփոփոխ։