Ռուսաստանի արտաքին գործերի նախարար Սերգեյ Լավրովն ինքնատիպ նվերներ է ստացել Հայաստանում բնակվող հայրենակիցներից: Ռուսական տանը հանդիպման ժամանակ մոլոկանների համայնքի ներկայացուցիչները նրան թթու կաղամբով տակառիկ են հանձնել։
- Մենք թթու կաղամբը հենց այնպես չենք ուտում, - ժպտալով նկատել է Լավրովը: - Մեր՝ մոլոկանների կաղամբն է, - մանրամասնել է համայնքի ներկայացուցիչը։
- Մոլոկանները սուրբ մարդիկ են, բայց արդեն հոտ է գալիս, - կատակել է նախարարը:
Եղել է նաև մարզական անակնկալ. լեգենդար հայ դարպասապահ Ռոման Բերեզովսկին նախարարին նվիրել է ինքնագրով ֆուտբոլի գնդակ:
Ոչ ֆորմալ մասից հետո հավաքվածներն անցել են լուրջ թեմաների քննարկմանը։
«Խոսել ենք հումանիտար համագործակցության զարգացման հեռանկարների, հայրենակիցների հետ փոխգործակցության մասին, ինչպես նաև քննարկել ենք Գիտության և մշակույթի ռուսական կենտրոնի ևս երեք մասնաճյուղերի բացման հնարավորությունը՝ Վանաձորում, Իջևանում և Կապանում, ի լրումն Գյումրիում արդեն գործող կենտրոնի», - հայտնել է Լավրովը:
Բացի այդ, այսօր Սերգեյ Լավրովին շնորհվել է Հայ-ռուսական համալսարանի պատվավոր դոկտորի կոչում: Դիպլոմը նախարարին է հանձնել բուհի ռեկտոր Էդվարդ Սանդոյանը՝ նշելով, որ ՌԴ ԱԳ նախարարը 2005 թվականին ներկա է գտնվել համալսարանի բացմանը: Ուսումնական հաստատությունում մինչ օրս պահպանվում է պատվավոր հյուրերի գրքում նրա գրառումը։
Որպես նվեր Լավրովը ստացել է նաև 9-րդ դարի Հայաստանի քարտեզի պատճենը:
ՌԴ ԱԳ նախարարն աշխատանքային այցով Հայաստան է ժամանել մայիսի 20-ին: Նա արդեն հանդիպումներ է ունեցել արտաքին գործերի նախարար Արարատ Միրզոյանի, նախագահ Վահագն Խաչատուրյանի, վարչապետ Նիկոլ Փաշինյանի հետ:
