ԱՄՆ-ը նոր պատժամիջոցներ է սահմանել Իրանի և «Հեզբոլլահ» խմբավորման դեմ։ 

Այդ մասին հաղորդում է ԱՄՆ ֆինանսների նախարարությունը։

Տեղեկատվության համաձայն՝ սահմանափակումների են ենթարկվել 8 ֆիզիկական անձ, 21 իրավաբանական անձ և 12 նավ։

Ազգային ժողովի «Քաղաքացիական պայմանագիր» խմբակցությունը շրջանառության մեջ էր դրել ԱԺ հայտարարության նախագիծ՝ «Բռնության ճանապարհով պետական իշխանությանը տիրանալու անթույլատրելիության և ժողովրդավարության պաշտպանության» մասին։

Հիմնավորման մեջ հիշատակվում է, որ 2025 թվականի հունիսին իրավապահները բացահայտել են ահաբեկչության փորձ՝ միտված երկրում սահմանադրական կարգի տապալմանը և ՀՀ օրինական իշխանությունների բռնի հեռացմանը։

«Ահաբեկչական խմբավորման անդամները և ղեկավարները ՀՀ Ազգային ժողովի ընդդիմադիր խմբակցությունների և նրանց ղեկավարների հետ սերտորեն կապված անձինք են, ովքեր վերջին շրջանում Հայաստանում կազմակերպել են բողոքի ցույցեր, հանդես եկել իշխանափոխության կոչերով՝ երբեմն հնչեցնելով բացահայտ բռնության և ատելության կոչեր ընդդեմ ՀՀ ընտրված իշխանությունների», - նշված է հայտարարության նախագծի հիմնավորման մեջ:

Այսօր ՔՊ-ի հեղինակած Հայաստանի դեմ ահաբեկչության մասին հայտարարությունն ԱԺ–ն ընդունեց 57 կողմ ձայնով։

ԱՄՆ նախագահ Դոնալդ Թրամփի հատուկ դեսպանորդ Սթիվեն Ուիթկոֆը նախատեսում է հաջորդ շաբաթ Նորվեգիայի մայրաքաղաք Օսլոյում հանդիպել Իրանի արտգործնախարար Աբբաս Արաղչիի հետ՝ Թեհրանի միջուկային ծրագրի շուրջ բանակցությունները վերսկսելու համար։

Նրանց խոսքով՝ հանդիպման վերջնական ամսաթիվը դեռևս որոշված ​​չէ։ 

Որոշ աղբյուրներ նաև հայտնել են, որ Ուիթկոֆը և Արաղչին «պահպանել են անմիջական կապը» հունիսին Իսրայելի և Իրանի միջև 12-օրյա զինված հակամարտության ընթացքում և դրանից հետո։

Ավելի վաղ իսրայելական N12 հեռուստաալիքը հայտնել էր, որ Վաշինգտոնը կապի մեջ է Թեհրանի հետ՝ հաջորդ շաբաթ Օսլոյում Իրանի միջուկային ծրագրի շուրջ բանակցությունները վերսկսելու համար։ Հունիսի 30-ին Սպիտակ տունը հայտնել էր, որ Ուիթկոֆը շարունակում է Իրանի հետ քննարկումները Թեհրանի միջուկային ծրագրի շուրջ համաձայնագրի շուրջ, սակայն չէր նշել, թե արդյոք հնարավոր են անձնական շփումներ այս շաբաթ։

Պուտինը և Թրամփը զրուցել են գրեթե մեկ ժամ, քննարկելով, ի թիվս այլ հարցերի, Ուկրաինայի հարցը, հայտնել է ՌԴ նախագահի օգնական Յուրի Ուշակովը: 

Նրա խոսքով՝ Թրամփը կրկին բարձրացրել է ռազմական գործողությունների արագ դադարեցման հարցը։ Պուտինը նշել է, որ հակամարտության քաղաքական բանակցային լուծման որոնումները շարունակվում են։

Ռուսաստանի առաջնորդը ԱՄՆ նախագահին ասել է, որ Մոսկվան չի հրաժարվի առաջացած հակամարտության բոլոր արմատական ​​պատճառների վերացումից։

Ըստ Ուշակովի՝ Պուտինի հետ զրույցում Թրամփը բարձրացրել է Ուկրաինայում ռազմական գործողությունների վաղաժամկետ դադարեցման հարցը։

Կոռուպցիոն ռիսկեր կան։ Եթե մեկ ընկերություն վարձակալել է, ամեն ինչ նորմալ է, շահութաբեր աշխատում է, ապա ինչու են ցանկանում դա վերցնել, հենց այնպես չեն վերցնում։ Այս մասին «Փաստինֆո»-ի հետ զրույցում ասաց  «Թրանսփարենսի ինթերնեյշնլ հակակոռուպցիոն կենտրոնի» ծրագրերի ղեկավար Վարուժան Հոկտանյանը՝ անդրադառնալով Երևանի քաղաքապետարանի կողմից Օղակաձև զբոսայգու 4-րդ հատվածը հանրային գերակա շահ ճանաչելու և Թենիսի կորտերը սրճարաններով փոխարինելու քաղաքային իշխանության նախաձեռնողականությանը։  ԹԻՀԿ փորձագետն արձանագրում է՝ պետք է պարզել, թե իրականում  ովքեր են։

Այգու տարածքը «խլելու» օպերացիայի մասին առավել մանրամասն «Փաստինֆո»-ն անդրադարձել էր հունիսի 16-ի՝ «Բիզնես խլելու օպերացիա՝ քաղաքային իշխանության ակտիվ մասնակցությամբ»  վերտառությամբ հրապարակմամբ։ Ինչպես հայտնել ենք՝ 2023թ․ մայիսին քաղաքապետ Տիգրան Ավինյանը ավագանու  նիստում հայտարարեց, որ «Էվոկաբանկ»-ի (EVOCABANK) խորհրդի նախագահը համայնքին է նվիրաբերել 300 մլն. ՀՀ դրամ՝ մարզադպրոցի վերակառուցման համար՝ այն գնահատելով որպես բացառիկ երեւույթ, իսկ 2024 թվականի հունվարին արդեն պարզվեց, որ քաղաքային իշխանությունը մտադիր էր Օղակաձև այգու 4-րդ հատվածը վերցնել իր իսկ ներկայիս սեփականատիրոջից ու հանձնել «Էվոկաբանկի» (EVOCABANK) հիմնական բաժնետիրոջ՝ Մարիետա Գևորկյանի, ընկերության տնօրինմանն, ընդ որում, հանրային գերակա շահ ճանաչելու քողի ներքո։

Վարուժան Հոկտանյանը «Փաստինֆո»-ի հետ զրույցում այս գործընթացը տարօրինակ գնահատեց՝ արձանագրելով նաև կոռուպցիոն ռիսկերը։

«Կասկածում եմ, որ սինքրոնիզացիա կա, այսինքն՝ ցանկանում են այդ ձևով խլել գույքը․․․ իրականում դա իրենց գույքը չէ, վարձակալության էին վերցրել՝ քաղաքապետարանից։ Մեղմ ասած՝ շատ տարօրինակ իրավիճակ է։ Նաև հասկացա, որ ցանկանում են Բագրատունյաց փողոցի վրա ինչ-որ բան կառուցել՝ թենիսի կորտերի նման, չգիտեմ՝ այդպես է, թե ոչ, բայց թղթի վրա այդպես է նշված։ Բագրատունյաց փողոցի վրա կառուցելու են նման կոմպլեքս, բնականաբար, ունևորների համար, հետո դա ներկայացնելու են այնպես, որ դա  վերցրել են, բայց կառուցել այլ տեղ, որ մարդիկ թենիս խաղան։ Կարծես թե նման սցենար են նախապատրաստում, բայց դա, միևնույն է, չի արդարացնում նրանց, որովհետև, եթե իսկապես քաղաքակիրթ երկրում ապրենք, ապա առաջին հերթին կկառուցեին մատչելի, գեղեցիկ, հարմարավետ սպորտային կոմպլեքս»,- ասաց Հոկտանյանը՝ հավելելով, որ այստեղ կա նաև այլ խնդիր, որ Կորտերն ինչ-որ տեղ նաև քաղաքի դեմքն էր, իր ուսանողության տարիներին շատերը հենց այդ կորտեր էին գնում, չի բացառվում, որ այսօր էլ այդ ավանդույթը շարունակվում է, մի փոքր տգեղ է ստացվում էսթետիկ տեսանկյունից, որ թենիսի կորտերի փոխարեն սրճարան տեսնեն, հատկապես, որ Օղակաձև այգում շատ սրճարաններ կան։

«Ի վերջո՝ մասնավորի համար սրճարան կառուցելն արդյո՞ք հանրային գերակա շահ պետք է ճանաչվի։ Այսինքն՝ ուր ենք հասել, որ, եթե իսկապես այդտեղ սրճարան են կառուցելու կամ նմանատիպ բան, առհասարակ, եթե այդ տարածքը փոխանցվելու է մասնավորի, այլ ոչ թե՝ պետական շենք կառուցվի կամ մի բան, որը հանրային նշանակության շինություն է լինելու, գուցե, թեև ճիշտ լուծում չէի համարի, բայց մի կերպ գուցե հասկանալի լիներ, բայց եթե հանրային գերակա շահի անվան տակ տարածք են ցանկանում վերցնել և մասնավորն այնտեղ ինչ-որ բան կառուցի և շահույթ ստանա, ապա դա ընդհանրապես կնշանակի վարկաբեկել հանրային գերակա շահի կոնցեպցիան։ Չի կարող նման բան արվել՝ հանրային գերակա շահի անվան տակ։ Թեև 2007-2009թթ դա տարածված երևույթ էր, փաստորեն, եթե սա ընթացք ունենա, ապա ստիպված կլինենք արձանագրել, որ ոչինչ չփոխվեց, այն, ինչ այն ժամանակ էր արվում, այժմ կրկնվում էր։ Այդ դեպքում հարց է առաջանում՝ ինչն էր 2018թ․ արվածի իմաստը, եթե ամեն բան պետք է «գա ի շրջանյս յուր», այսինքն՝ վերադառնում ենք նույն մեթոդներին։ Մեղմ ասած տարօրինակ է, մտահոգիչ և բացասական երևույթ է»,- ասաց Վարուժան Հոկտանյանը։

ԹԻՀԿ փորձագետն ընդգծում է՝  կոռուպցիոն ռիսկեր կան՝ սկսած նրանից, թե ինչ ընկերություն է, որ բառացիորեն մի քանի օր առաջ է ստեղծվել։ Բացի այդ, պետք է պարզել, թե իրական շահառուից բացի ովքեր են շահառուները․ «Իրականում իրական շահառուից ավելի այն կողմ գնացող, այսպես ասած, կապեր կան, այսինքն՝ ինչ-որ մեկի ծանոթը, ընկերը, համադասարանցին, գուցե պետք է լրագրողական հետաքննություն իրականացնել և պարզել, թե ովքեր են այդ մարդիկ, ինչով են շնչում, ինչ են անում, ում հետ շփվում։ Ինձ համար հարցական մնաց՝ ովքեր են այդ մարդիկ։ Լավ, ֆորմալ գիտենք, «Էվոկաբանկի» 100 տոկոս բաժնետոմսերի սեփականատերն ով է, բայց պետք է հասկանալ՝ ինչ-որ կապեր կան, թե զուտ բիզնես է, որը, բնականաբար, որևէ բարոյական սահմաններ չի ճանաչում»։

Մեր զրուցակիցը նկատում է՝ «Մեկ ընկերություն տարածքը վարձակալել է, ամեն ինչ նորմալ է, շահութաբեր աշխատում է, ապա ինչու են ցանկանում դա վերցնել, հենց այնպես չեն վերցնում։ Այլ հարց է, որ լինեն նոր, ավելի ժամանակակից, մի հոյակապ թենիսի մարզադպրոց, կենտրոն կառուցեին, կասեինք լավ, ավելի թափով մեկը հայտնվեց, որ դա է ցանկանում անել, բայց որքան ես հասկացա՝ այդպիսի ընկերություն չէ, որ ցանկանում է ձեռք բերել տարածքը, կասկածում եմ, որ նպատակ ունեն՝ այդտեղ ավելի հոյակապ մի թենիսի կորտեր և մարզադպրոց ստեղծել, կասկածում եմ։ Ավելի շատ, ինչպես մեր շատ գործարարների ֆանտազիան սահմանափակ է, այդ ֆանտազիան կհերիքի սննդի օբյեկտների, ոչ թե՝ բարձր մատերիաների համար»։

Հարցին՝ ինչու ի վերջո որոշեցին գնալ հանրային գերակա շահ ճանաչելու ճանաչելու ճանապարհով, ոչ թե՝ վարձակալության պայմանագիրը խզելու՝ Հոկտանյանը պատասխանեց՝ նշելով, որ դա առաջին հարցն է, որն ինքը տվեց, որի պատասխանը չունի՝ ինչու որոշվեց հանրային գերակա շահ ճանաչել, գուցե, որովհետև դա պետական էր և վարձակալության էր տրված, դա որպես հիմք ծառայեցնել և վարձակալության պայմանագիրը խզել․ «Այսինքն՝ պատճառահետևանքային կապն այդ ձևով անել, հանրային գերակա շահի անվան տակ այդ վարձակալության տրված տարածքները ․․․ Ենթադրում եմ՝ ժողովրդական լեզվով ասած՝  «կեղտ չեն բռնել», վճարումները կատարվել է, նորմալ աշխատել , շահույթ բերել, հանկարծ որոշել են հանրային շահ ճանաչել։

Գուցե։ Կամ իսկապես լավ է աշխատել վարձակալը, կամ չգիտեմ ինչ է եղել։ Իսկապես տարօրինակ է, որ այլ ճանապարհով չեն գնացել։ Կարող էին ապօրինի ծագման գույք հայտարարել․․․ Չնայած, եթե ասում ենք ապօրինի ծագում ունեցող գույք, ապա սա վարձակալություն է, դա իրենց գույքը չէ։ Եթե վարձակալության են վերցրել, ապա կարող են ասել, որ այդ գույքը վարձակալության են հանձնել՝ իբրև կաշառքի միջոցով, միայն նման բան կարող են ասել, սակայն դա շատ թույլ հիմքեր ունի»։

«Այսօր՝ 03.07.2025թ., Գերաշնորհ Տ. Միքայել Արքեպիսկոպոս Աջապահյանի պաշտպանները հատուկ վերանայման բողոք են ներկայացրել ՀՀ վերաքննիչ քրեական դատարան` կալանք կիրառելու վերաբերյալ առաջին ատյանի դատարանի դատավոր Մասիս Մելքոնյանի 28.06.2025թ. որոշման դեմ»: Այս մասին հայտարարություն է տարածել Միքայել Սրբազանի պաշտպանների թիմը։

«Առաջին ատյանի դատարանի որոշումը հանձնվել էր պաշտպաններին 01.07.2025թ.»,–նշվում է հայտարարության մեջ:  

Երևանի քաղաքապետարանից հայտնում են, որ հուլիսի 4-ին և 5-ին Երևանում անցկացվող “TRICOLOR” Yerevan Night Run վազքերի ընթացքում քաղաքի մի շարք հատվածներում կդադարեցվի երթևեկությունը: Նախաձեռնությունը նվիրված է ՀՀ պետական խորհրդանշանների և ՀՀ Սահմանադրության օրվան։

Մասնավորապես փակ կլինեն.

Հուլիսի 4-ին՝ ժամը 21:00-ից կդադարեցվի «Մարիոթ-Արմենիա» հյուրանոցի հատվածից Վազգեն Սարգսյան փողոց հատվածի երթևեկությունը, որտեղից էլ տրվելու է վազքի մեկնարկը:

Ժամը 21:50-ից կդադարեցվի Հանրապետության հրապարակում, Հանրապետության հրապարակից Նալբանդյան փողոցում մինչև Նալբանդյան-Թումանյան փողոցների խաչմերուկ, Թումանյան փողոցի՝ Թումանյան-Նալբանդյան փողոցների խաչմերուկից մինչև Թումանյան-Աբովյան փողոցների խաչմերուկ, Պուշկինի փողոցից Աբովյան փողոց, Աբովյան փողոցի՝ Աբովյան-Թումանյան փողոցների խաչմերուկից մինչև Հանրապետության Հրապարակ հատվածների երթևեկությունը:
Վերը նշված երթուղով վազքը կավարտվի ժամը 23:45-ին:

Հուլիսի 5-ին՝ ժամը 09:00-ից կդադարեցվի «Մարիոթ-Արմենիա» հյուրանոցի հատվածից Վազգեն Սարգսյան փողոց հատվածի երթևեկությունը, որտեղից էլ տրվելու է վազքի մեկնարկը:

Ժամը 10:00-ից մասնակիորեն կդադարեցվի Հանրապետության հրապարակի և ամբողջությամբ Վազգեն Սարգսյան փողոցի երթևեկությունը:

Վերը նշված երթուղով վազքը կավարտվի ժամը 11:30-ին:

Ազգային ժողովը երկրորդ ընթերցմամբ և ամբողջությամբ ընդունել է ՆԳ նախարարության մի շարք օրենսդրական նախաձեռնություններ։

✔️ՆԳ նախարարի տեղակալ Արմեն Ղազարյանը, ներկայացնելով «Ճանապարհային երթևեկության անվտանգության ապահովման մասին» օրենքում լրացումներ և փոփոխություն կատարելու մասին» օրենքի նախագիծը, նշել է, որ այն ընդունելու արդյունքում վարորդական վկայականը և հաշվառման վկայագիրը կարող են լինել նաև թվային տարբերակով՝ թվային տվյալների բազայում:

Ըստ նախագծի՝ պարեկային ծառայողի կողմից վարորդին նույնականացնելու և նրա վարորդական վկայական ունենալու փաստը հաստատելու դեպքում անձի նկատմամբ չի կիրառվի առանց վարորդական վկայականի տրանսպորտային միջոց վարելու համար նախատեսված տույժը։
Առաջարկվում է սահմանել ևս մեկ կարգավորում․ քաղաքացին վճարի դիմաց կարող է ստանալ արագացված ծառայություններ։ Մասնավորապես՝ վարորդական իրավունքի վկայական ստանալու տեսական կամ գործնական քննություններին արտահերթ մասնակցելու համար, վճարելով 30.000-45.000 դրամի սահմաններում պետական տուրք, վարորդի թեկնածուն կարող է ընտրել քննությունը հանձնելու իր նախընտրած օրը։

Օրենսդրական փաթեթով առաջարկվող կարգավորումներն ուժի մեջ կմտնեն սեպտեմբերի 1-ից: 

✔️ՆԳՆ օրենսդրական մեկ այլ նախաձեռնությամբ մեկ միասնական տեղեկատվական համակարգում կմեկտեղվեն բնակչության պետական ռեգիստրում ներառման ենթակա տվյալները, և պետական մյուս մարմիններն իրենց գործառույթների իրականացման համար կօգտվեն բնակչության պետական ռեգիստրից:
ՆԳ նախարարի տեղակալ Արմեն Ղազարյանի խոսքով՝ ներկայումս բնակչության վերաբերյալ տեղեկատվությունը պահպանվում է տարբեր տեղեկատվական համակարգերում՝ պայմանավորված այս կամ այն մարմինների խնդիրների իրականացմամբ։ Ըստ նրա՝ նոր օրենքի ընդունումը հնարավորություն կտա` ապահովել պետական կառավարման համար ռեսուրսների ճիշտ պլանավորում, որակյալ ծառայությունների մատուցում, անձանց իրավունքների պաշտպանություն, այդ թվում՝ ազատ տեղաշարժվելու, բնակության վայր ընտրելու և անձի՝ ըստ բնակության վայրի հաշվառվելու իրավունքի իրացում:

✔️Ընդունվել է նաև ՆԳ նախարարի տեղակալ Արմեն Մկրտչյանի ներկայացրած՝ «Ոստիկանությունում ծառայության մասին» օրենքում փոփոխություններ և լրացումներ կատարելու մասին» և «Փրկարար ծառայության մասին» օրենքում փոփոխություն կատարելու մասին» օրենսդրական փաթեթը, որով առաջարկվում է հանել ոստիկանությունում ծառայության անցնելու տարիքային շեմի սահմանափակումը:

Նախարարի տեղակալի ներկայացմամբ՝ նախագծով հնարավորություն է տրվում նաև ոստիկանությունում առաջին անգամ պաշտոնի նշանակված ծառայողին ատեստավորվել ոչ թե պաշտոնի նշանակվելուց վեց ամիս, այլ՝ երկու ամիս անց:

Նախագծի ընդունմամբ ակնկալվում է օպերատիվ կերպով լուծել Համայնքային ոստիկանությունն անհրաժեշտ մասնագիտական պատրաստվածություն ունեցող կադրերով համալրելու խնդիրը, լավարկել ոստիկանությունում ծառայության անցնելու, ինչպես նաև ոստիկանության ծառայողների ատեստավորման գործընթացները: Բացի այդ, ընդլայնվում են նաև սահմանային տարիքը լրանալուց հետո ոստիկանությունում ծառայությունը երկարաձգելու հնարավորությունները։

✔️ՆԳ նախարարի տեղակալ Արմեն Մկրտչյանի ներկայացրած՝ «ՀՀ քրեական օրենսգրքում փոփոխություններ և լրացումներ կատարելու մասին» նախագծով առաջարկվում է տրանսպորտային միջոցներ վարելու իրավունք չունեցող անձի կողմից տրանսպորտային միջոց վարելու համար օրենքով սահմանված պատասխանատվության կիրառումից հետո մեկ տարվա ընթացքում նույն արարքի կատարումը նախատեսել որպես հանցագործություն: Առաջարկվում է որոշ սանկցիաների մասով խստացնել քրեական օրենսգրքի 344-րդ հոդվածով նախատեսված արարքների համար պատասխանատվությունը:

Օրենքը կլավարկի տրանսպորտային միջոցի վարորդի բացակայության դեպքում տրանսպորտային միջոցը հատուկ տարածք տեղափոխելու պարագայում վարորդին իրազեկելու գործիքակազմը, կհստակեցվի ոստիկանության կողմից շարժական տեսաձայնագրող կամ լուսանկարահանող տեխնիկական միջոցներով ենթադրյալ վարչական իրավախախտում կատարած անձանց նույնականացման իրավունքը:

Նախատեսվում է նաեւ արգելել 18 տարին չլրացած անձանց արտաքին տեսքով կամ կառուցվածքով սառը զենքին նմանվող և արտադրական, կենցաղային, տնտեսական, ուսումնական, մշակութային կամ դեկորատիվ նշանակություն ունեցող առարկաների, սարքերի կամ գործիքների վաճառքը, նշված անձանց այդ առարկաների, սարքերի կամ գործիքների վաճառքի մեջ ներգրավելը, ինչպես նաև տասնվեցից մինչև տասնութ տարեկան անձանց կողմից դրանք կրելը։

Փաշինյանը իր գործողություններով նպաստում է ընդդիմադիր ուժերի միաբանմանը։ Մեր քաղաքական գիտակցության մեջ միտումնավոր արմատավորել են դոգմա, թե ամեն ինչ կախված է մեկ խարիզմատիկ կերպարից. շուտով կտեսնեք հավաքական լիդերությամբ միավոր։

Եթե մենք ընտրենք անպայման ինչ-որ մի լիդերի շուրջը համախմբվելու գաղափարը, ապա դա ձախողելու ամենակարճ ճանապարհն է դառնալու։ Շարժումը պետք է ղեկավարի կոլեկտիվ առաջնորդը, իսկ թե հետագայում ով կստանձնի, օրինակ, վարչապետի դերը, ցույց կտա կյանքը, պայքարը, aysor.am-ի՝ «Հարցեր կան» հաղորդմանն ասել է ՀԱԿ փոխնախագահ Լևոն Զուրաբյանը։

«Այս ձեռնարկումը նշանակելու է նոր իրավիճակ, երբ, օրինակ, տասնմեկ մարդ, վայելելով հանրության վստահությունը, կղեկավարի շարժումը։ Ամեն օր այդ մարդիկ կկայացնեն ստրատեգիական որոշումներ, պետք է կազմակերպեն բազմահազարանոց հանրահավաքներ, բանակցեն։ Այդ ընթացքում բնականորեն առաջ կգան լիդերներ։ Շարժման հավաքական առաջնորդության կազմի հարցում մենք արդեն բանակցություններ ենք վարում, բոլորս միասին մեր առջև վերջնաժամկետներ ենք դրել։

Սահմանադրությամբ երաշխավորված քաղաքական պայքարի բոլոր ձևորը կիրառվելու են, երկրի կառավարումը ստանձնելու է լիովին կայացած համակարգ, մարդիկ պետք է տեսնեն ձևավորված այլընտրանքը»։

2020-21 թվականներին Կտրիճ Ներսիսյանը հանդես եկավ իշխանությունների հրաժարականի կոչով։ Դրանից հետո տեղի ունեցած արտահերթ խորհրդարանական ընտրություններում, որը միջազգային հանրության կողմից գնահատվեց որպես ազատ, ժողովրդավարական, մրցակցային, ժողովուրդը վստահության քվե տվեց կառավարող թիմին։

«Սա նաև նշանակում էր ժողովրդի անվստահություն Վեհարանը զբաղեցրածների նկատմամբ։ Այս մասին գրել է վարչապետ Նիկոլ Փաշինյանը:

«2025 թվականի հունիսին Մայր Տաճարի զանգերը հնչեցվեցին հավաքվելու կոչով։ Ներկա հոգևորականների և հավաքված քաղաքացիների թիվը չի գերազանցել 1,500-ը։ Եվս մեկ փաստարկ, որ Կտրիճ Ներսիսյանը պետք է րոպե առաջ ազատի Վեհարանը։ Այլտարբերակ չկա»,- գրել է նա: